ਹੋ ਗਈ ਭੁੱਲ ਕਰ ਲਿਆ ਵਾਅਦਾ

ਹੋ ਗਈ ਭੁੱਲ ਕਰ ਲਿਆ ਵਾਅਦਾ
ਲਾਜ ਰੱਖੇਂਗਾ ਤੂੰ ਹੀ ਦਿਲਦਾਰਾ
ਟੁੱਟ ਜਾਵੇ ਭਰੋਸਾ ਨਾ ਮੇਰਾ
ਮੈਨੂੰ ਹੋਣਾਂ ਪਵੇ ਨਾ ਸ਼ਰਮਿੰਦਾ
ਤੇਰੀ ਰਹਿਮਤ ਦਾ ਹੈ ਬੜਾ ਚਰਚਾ
ਮੇਰੀ ਵਾਰੀ ਕਰੀਂ ਨਾ ਦਿਲ ਸੌੜਾ
ਮੈਂ ਹਾਂ ਟਾਪੂ ’ਚ ਗਿਰਦ ਹੈ ਸਾਗਰ
ਕੋਈ ਕਸ਼ਤੀ ਹੈ ਨਾ ਕੋਈ ਰਸਤਾ
ਤੇਰੀ ਮਰਜ਼ੀ ਹੈ ਜਿਦਾਂ ਮਰਜ਼ੀ ਕਰ
ਤੇਰੇ ਹੁੰਦਿਆਂ ਕਰਾਂ ਮੈਂ ਕਿਓਂ ਚਿੰਤਾ?
ਪਰਦੇ ਕੱਜੇ ਨੇ ਤੂੰ ਅਨੇਕਾਂ ਦੇ
ਦੋਸਤ! ਮੇਰਾ ਵੀ ਰੱਖ ਲੈ ਤੂੰ ਪਰਦਾ
ਦੇਰ ਲਾਈ ਤਾਂ ਨ੍ਹੇਰ ਪੈ ਜਾਊ
ਦੇਰ ਕਿਓਂ ਲਾਓਣੈਂ ਸੋਹਣਿਆਂ! ਆਜਾ!!
ਅੱਗੇ ਸੌ ਬਾਰ ਅਜ਼ਮਾਇਆ ਮੈਂ
ਹਰ ਦਫ਼ਾ ਉੱਤਰਿਆਂ ਹੈਂ ਪੂਰਾ
ਕੱਤਾਅ:
ਇਸ ਦਫ਼ਾ ਕਰ ਗਿਓਂ ਜੇ ਅਣਗਹਿਲੀ
ਮੈਨੂੰ ਕਰਨੈਂ ਸ਼ਰੀਕਾਂ ਨੇ ਰੁਸਵਾ
ਆ ਕੇ ਮੈਨੂੰ ਉਡੀਕ ਹੈ ਤੇਰੀ
ਤੇਰਾ ਰਸਤਾ ਮੈਨੂੰ ਵੇਖਦਾ ਹੈ ਬੈਠਾ
ਤੇਰੇ "ਦੀਪਕ" ਦੀ ਲੋਅ ਨਾ ਬੁਝ ਜਾਵੇ
ਫ਼ੈਲ ਜਾਵੇ ਨਾ ਬਸਤੀ ਵਿੱਚ ਨ੍ਹੇਰਾ